पुणे सिटी टाईम्स ( PCT) प्रतिनिधी.
लाचेची मागणी केल्याप्रकरणी वरिष्ठ पोलीस निरीक्षक व सहाय्यक फौजदार यांना निलंबित करण्यात आल्याने, पोलीस दलात खळबळ उडाली आहे.फसवणुकीच्या गुन्ह्यात अटक न करण्यासाठी ५ लाख रुपयांची मागणी करून २ लाखांत सेटलमेंट करणारे गुन्हे शाखेच्या युनिट ३ चे तत्कालीन वरिष्ठ पोलीस निरीक्षक श्रीहरी बहिरट व सहायक फौजदार संतोष क्षीरसागर यांना पोलिस आयुक्त अमितेश कुमार यांनी निलंबित केले आहे.
श्रीहरी बहिरट हे सध्या गुन्हे शाखेच्या दंगा काबु पथकामध्ये कार्यरत होते. श्रीहरी बहिरट हे गुन्हे शाखेच्या युनिट ३ चे पोलीस निरीक्षक असताना श्रीहरी बहिरट यांच्या सांगण्यावरुन फसवणुकीच्या गुन्ह्यात सह आरोपी न करण्यासाठी सहायक फौजदार संतोष क्षीरसागर याने तक्रारदाराकडे ५ लाख रुपयांची मागणी केली होती.
लाच लुचपत प्रतिबंधक विभागाकडे याबाबत तक्रार मिळाल्यावर त्यांनी त्याची पडताळणी केली. त्यात क्षीरसागर याने तडजोडीअंती २ लाख रुपये स्वीकारण्यास सहमती दर्शविली होती. यावेळी श्रीहरी बहिरट यांना तक्रारदार याचा संशय आल्याने त्यांनी त्याच्याकडील व्हाईस रेकॉर्डर काढून घेतला होता.
त्यानंतर सापळा कारवाई झाली नाही. परंतु, लाचेची मागणी झाली असल्याने क्षीरसागर याच्याविरुद्ध खडकी पोलीस ठाण्यात गुन्हा दाखल करण्यात आला. या गुन्ह्यात पोलीस निरीक्षक श्रीहरी बहिरट यांच्या सहभागाविषयी लाच लुचपत प्रतिबंधक विभाग तपास करीत आहे. लवकरच बहिरट यांच्यावर गुन्हा दाखल करण्यात येणार असल्याचे सुत्रांनी सांगितले आहे.